Ganz z’usserschtusse und änne am Rhy,
döt liit e schös Dörfli mit sehr guetem Wy!
Holla diholla und holladiho
Z’ Thäynge dusse do isch’s halt eso!
Und wie da isch? Losed emol:
Mir sind Energiestadt und chinderfrüntlich grad au,
dezue isch de Gmeindrat sehr gschiid und au schlau.
Er förderet ‘s Gwerb und au d’ Industrie,
nu ‘d Wohnqualität, die schriibt er recht chli.
E ganzes Quartier mue Verchehrslärm erliide,
üsen Gmeindrot meint: «Da isch nid ‘z vermiede».
Holla diholla und holladiho
Z’ Thäynge dusse do isch’s halt eso!
Dafür chasch do ohni Bewilligung Schrott deponiere,
muesch do dezue nid mol de Gmeindrot go schmiere.
Wänn d’jommerisch: «mini Exischtenz isch bedroht»!
Chasch alls deponiere, soviel wie nu goht.
Lueged doch numol wie da bim Chesslerloch usgseht!
Und da isch dänn öppe nonid alles:
E Parkverbot durezsetze isch ächt er Problem,
wa ssöll mä au mache? Es isch nid bequem.
Holla diholla und holladiho
Z’ Thäynge dusse do isch’s halt eso!
Uf de hindere Chesslerlochstross will de Gmeindrot nämlich e Parkverbot installiere,
dänn d’Laschtwägeler tüend dött d’Umgebig versch…miere!
So tuet d’Polizei eifach ei Parkbuess kassiere
und loht dänn dötte de Laschter (‘s ganz Wuchenend!) gratis campiere!
Händers gmerkt?
So würd useme Buessezettel en Parkschii!
Zahlsch eimol e Buess, dänn loosch din Chlapf stoh,
wie ‘s Bispiel jo zeigt, tuets eifach so goh!
Holla diholla und holladiho
Do z’ Thäynge usse, do gohts halt eso!
